عاجل | اسامة سريا ينفي ما رددته وكالات الانباء عن إن عصام شرف يتصدر قادة العالم ويؤكد إن مبارك هو من يتصدرهم... ولدى مواجهته بقرار حبس مبارك في سجن طرة قال ان مبارك كان السبب في ثورة يناير التي اتت بعصام شرف الذي يقود المسيرة الآن... فكما ترون إنها تعبيرية

وقفة منطقية مع الوضع الحالي: لماذا نثور ؟

أنا هاكتب الكلام ده في بلوج عشان مفضلش اشرحه لاصحابي واحد واحد... ومعلش هو بالعامي عشان متجمع من ردودي الكتيرة على أصحابي...

الاول لازم نسأل نفسنا.. هي الثورة نجحت ؟ طب إيه تعيرف نجاح الثورة ؟ مش إن احنا ناخد اللي احنا عايزينه ؟ طب وهي هتنجح لما ناخد كل اللي احنا عايزينه ولا لما نبقى على الطريق الصح بس واللي احنا عايزينه هيجي ؟ يعني هل الثورة هتبقى اسمها نجحت لما إن شاء الله بعد عمر نبقى من اقوى 20 اقتصاد في العالم ؟ أكيد لأ،، ده كده اسمه اكتمال أهداف الثورة، مش النجاح في حد ذاته... يبقى النجاح هو وقت مانحط رجلنا على بداية الطريق الصح... طب وهل ده حصل ولا لسة ؟

لأ طبعا النظام القديم لسة عايش إنت مش شايف الجيش عمل يضرب في الناس والمجرمين لسة بيفرج عنهم والمحافظين والمسئولين القدام لسة في مكانهم ؟

آه طبعا وديه حاجة تزعلنا كلنا، بس هل ده بيحصل لأن ال"نظام القديم" لسة عايش والمجلس هيبيع البلد عشان يرجع النظام القديم ؟

طب براحة كده... لو فيه مؤامرة والنظام القديم لسة عايش... هيفيده في إيه الابقاء على الرموز الفاسدة والظباط المجرمين ؟ مايطيرهم كلهم ويبدأ يسرق بوجوه الناس واثقة فيها... واهو حتى المنطق بيقول لو حد الناس بتكرهه دخله السجن ولا اقتله عشان تكسب حب الناس وبعد كده اسرق براحتك صح ؟

طيب اللي جاي ده تحليل منطقي للي بيحصل فيه حبة تفسيرات وإستنتجات... وفيه حاجات ناقصة منقدرش نبررها، بس نقدر نستبعد أسباب ليها، بس الأول نتفق على حبة حاجات...

 اولا فاسد يعني بيدور على مصلحته هو بس، مش بيعمل فساد لله والوطن.. ثانيا مفيش فاسد عنده ولاء لحد... إذا كان باع بلده عشان الفلوس، يبقى هيبيع صورته قدام الناس اللي هي مستقبله في البلد عشان ولاء لرمز سابق ؟

1- الاول طنطاوي ده إيه نظامه ؟ مش كلنا عارفين إنه راجل فاسد وكان من رجالة مبارك الأولى ؟ هل نزل عليه الصلاح والتقوى فجأة ؟

 لأ بس طنطاوي زيه زي أي راجل فاسد همه الأول مصلحته... وقدامه دلوقتي خيارين... يأما يحاكم الناس ديه ويخلص منهم ويبان بطل وحامي الثورة واحنا نصدقه ونعمل عبط ، يأما مايحاكمهش ويكره الناس فيه وفي الجيش كله لحد مايتحاكم هو شخصيا لما الرئيس الجديد يجي وكل ده عشان حبايب زمان... طنطاوي دلوقتي من مصلحته الشخصية ومصلحة المؤسسة العسكرية ككل انه يتم الانتقال للديمقراطية صح، لأن ده اللي بياكل اليومين دول.. خلاص بقت باينة قوي إن الفاسد هيتجاب مهما حصل، وإن حكم فرعون عمره ماهيرجع، يبقى يعمل كده لمين ؟ يقتل المتظاهرين ليه ؟ يسيب الفاسدين في مكانهم عشان مين ؟

2- "النظام القديم" ده... هدفه يضرب ويقتل ويطلع الناس براءة ؟ ولا هدفه يسرق وينهب ؟ لو هدفه يسرق وينهب يبقى مش محتاج يضرب ويقتل ويطلع الناس براءة... لأن ده بيقوم الناس ضده وبيصعب مهمته مش بيسهلها، ولو هدفه التانية يبقى نظام هماه المباديء الفاسدة أكتر من مصلحته الشخصية !!

3- الاجراءات بتاعت المقاضاة عشان القضية تطلع دستورية 100% هتاخد وقت، لو كنا عايزين نحبسهم وخلاص كنا قتلناهم زي الثورة الفرنسية، لكن متنسوش إن احنا اللي طلبنا محاكمة عادلة عشان مايجيش واحد بعد 50 سنة ويقول مبارك ضحية الثورة... وأنا بتكلم مع قضاة كل يوم وعارف إن اجراءات الكسب الغير مشروع بالذات بتاخد وقت قوي... وبصوا للي حصل مع كل الدكتاتورات السابقة وإزاي الفلوس كانت بترجع بعد 7 و8 سنين...

4- طبعا محدش ينكر إن فيه تباطؤ في بعض القضايا، لكن ده زي مابقول تقصير مش نظام فاسد... من مصلحة مين التباطؤ ده ؟ أكيد المجلس لو فاسد مش هتوصل معاه الاصالة والجدعنة إنه يودي نفسه في داهية عشان صحاب زمان..

5- طب بالنوسبة للقضايا اللي عمالة تروح منا، والناس اللي بتاخد براءة ؟ ده حاجة من الاتنين... ياما هم عرفوا يخبوا الأدلة وقت الثورة، حاجة زي قتل المتظاهرين الدليل الوحيد ضد مبارك هو الامر المباشر... لو الورق أو التسجيل اتحرق خلاص كده مش هنعرف نقتص منه، وده ملهاش دعوة بفساد ولا نيلة... ده مجرم وعرف يخبي اجرامه... والسبب التاني ممكن يكون الرشوة والفساد الموضعي... وده موجود في كل حتة وكل مكان وهيفضل موجود... خصوصا في بلد لسة طلعة من الظروف بتاعتنا ديه... تفتكروا حبيب بعد ماسرقله كام مليار مش هيستخسر في القدي كام واحد منهم عشان ينقذ رقبته ؟ والناس المرتشية ده هتفضل في مكنها لحد مانقفش عليهم حاجة... ماينفعش نحاكم القاضي عشان حكم حكم مش عاجبنا... مش هي ده المبادئ اللي نزلنا الثورة عشانها

6- طب لما هو فيه فساد موضعي وال مجلس وعصام شرف نفسه عارفين، ساكتين ليه ؟ عشان مينفعش تروح لقاضي تقوله امشي عشان إنت فاسد... من مباديء القضاء العادل استقلال الهيئة القضائية، عشان القاضي ميخفش يحكم حكم ضد الوزراء... لازم دليل على الفساد ده... مينفعش نخلي الثورة ذريعة للاحقاد إنها تستبعد أي حد... مينفعش يكون الاستبعاد مبني على حكم غير موضوعي كده... الناس الفاسدة ديه هيفضله قاعدين يأما ريحتهم هتفوح زي احمد شفيق وهيمشوا غصبا عنهم، يأما هايلعبوها صح ويتلونوا بألوان الثورة وساعتها الماضي بتاعهم هو اللي هيقضي عليهم بس بالأدلة الموثقة...

7- ضرب الشعب فوق دماغه غلط، بس الجيش لما كان بيطبطب على الشعب حصلت فتنة امبابة، والجيش معندوش غير حال واحد... الضرب، عشان كده كل مالدنيا هديت، وسبنا الامور تاخد مجراها، كل مخلصنا من المجلس اسرع وجبنا حد عند حل تاني غير الضرب

8- أنا نزلت يوم 25 ويوم 28 وأيام كتير بعد كده وكنت بنزل قدام في الثورة ومقتنع بيها ومن اوائل الناس اللي دعوا ليها.. عشان كده خايف عليها ومش كل شوية هانزل اعطل عمل الجيش.. كويس إنه يكون فيه ناس في الشارع عشان ده بيدي سلطة تشريعية للشعب، بس مش كويس انهم يقعدوا هناك على طول... لازم هتحصل تجاوزات، ولما تحصل الجيش هيضرب، ولما يضرب الناس هتكرهوا وهتنزل أكتر، وده اللي بيعطل الثورة أكتر... لازم نسأل نفسنا، هل اللي احنا هنعمله ده يستاهل التضحية ؟ هل لما نعجل بالحكم على مبارك كام شهر ده يستاهل نقلب البلد كلها ونموت كام شهيد تاني ؟

9- طب طنطاوي راجل فاسد بس بيحاول بيعمل الصح... هتسيبه لمجرد إنه بيعمل الصح ؟ إنت معندكش مباديء؟ آه لازم نسيبه لأن تمن ابعاده غالي قوي... أغلى من أي حاجة دفعناها لحد دلوقتي... لو طلعنا ضد الجيش مش هيبقى فيه حد يحوش عنا، وهنبقى عاملين زي ليبيا... الموضوع مش هيرسي على 300 شهيد واقتصاد منهار... وبعدين معظم الصفحات اللي بتقوم الناس ضد الجيش زي صفحة ضباط من اجل الثورة عندها مشاكل شخصية مع المؤسسة العسكرية...

اهه أنت بتتكلم زي بتوع الاستقرار أيام الثورة... كلهم قاعدوا يقولوا كده وفي الآخر اتنقلنا للاحسن... عشان ساعتها كان عندنا حلم صعب ممكن ندفع عشانه دمنا واقتصاد كام سنة قدام... انما دلوقتي بعد ماكل شيء بقى واضح وإن شاء الله الطريق باين قدمنا تقدر تقولي إيه حلمنا ده اللي هنموت عشانه ؟ محاكمة مبارك ؟ ماهو كده كده هيتحاكم.. انتم مستعجلين على إيه ؟ بتعترضوا على الحكم قبل ماالحكم يطلع أصلا ؟ لما ياخد براءة (براءة نهائية مش افراج مع كفالة) نبقى ننزل... هو ميدان التحرير هيطير ؟ ولا هتقولي مش هنقدر نحشد تاني  ؟ دحنا دلوقتي ممكن ننزل مليون واحد في أسبوع عشان نحتفل بمولد سيدي العريان... مش هنعرف نطلع في  الجد ؟

 من الاخر في حاجات كتير غلط بتحصل.. وكان ممكن نتجنب معظمها, بس ده لازم هيحصل في دولة حديثة العهد بالديمقراطية... الكفاءات لسة مش هي اللي بتحكمنا, بس هيحكمونا بعدين... الغلطات ديه مش سببها مؤامرة ولا فساد صانعي القرار... الغلطات ديه سوء تصرف وفساد صغار رجال الدولة.... وحلها في توعية النظام الحالي من اخطاء الناس ديه.. حالها إن احنا نبقى عين النظام على أفراده... وديه ثورة العمل اللي بنسمع عنها...

الثورة الحقيقية نجحت يوم ما الجيش حس إن مصلحته مابقتش مع النظام السابق... يوم ما المجلس العسكري انعقد وقال انه في انعقاد مستمر... قبل تنحي الرئيس وقبل ماشفيق يمشي وقبل امن الدولة مايسقط... الناس ديه كلها أفراد ومؤسسات فاسدة.. والفاسد ميعرفش يتعامل في بيئة نظيفة... التغير لما بيجي من فوق بيبقى اسرع بكتير... بس لازم هياخد وقت... شفيق كان لازم يمشي، ويوم مامشي كان تطور طبيعي... لأن الثورة كانت نجحت خلاص... وبقايا النظام الفاسد دلوقتي بتحاول تتعايش وتستخبى... بس مصيرها تغور زي الباقي... لأن راس النظام خلاص طار... وبقى صنع القرار بيدور على مصلحتنا وبيسمع كلامنا... يمكن مش بسرعة قوي... ويمكن كمان تكون في محاولات لقلب الثورة... عشان كده لازم نكون صاحيين، ونخلي بالنا ونعترض على كل غلط... مفهاش حاجة لما ننزل الشارع نعترض على اللي مش عجبنى... ماهي ديه الديمقراطية  اللي احنا عملنها، بس نلتزم بالقانون... نرجع قبل الحظر... مانشتبكش مع حد ومانهجمش حد... وبرضه نخلي النزول بحساب، لأن التجمعات ده سهل قوي يحصل فيها مشاكل... فامنندفعش ورا مشاعرنا، ونفكر دايما، نزولنا ده يستاهل ؟ ولا نازل عشان واحشني احساس الميدان وارفع راسك فوق ؟

لاجل مايعلى الموج علينا...

زرع وناشف وسط الطارح

حبة طوب على كام مولوتوف

عود كبريت بتاريخ امبارح

لاجل مايولع ويا ألوف

نسيوا صوت العقل الراجح 

ياللي بتكره تكره مين ؟

تكره جلدك لحمك دمك ؟

ربك لو عاز كان فرض الدين

بس ماعزش ودي حكمة ربك

ياللي خايف تخاف من مين ؟

ديه سفينة واحدة وكتفي في كتفك

خيركم خيرنا يا بني آدمين

تعرف حقي واعرف حقك

لاجل مايعلى الموج علينا

تفضل عايمة ويستر ربك

مصر ياما يا سفينة

امتى هترسي داحنا في عرضك ؟

Photo and poem by me